संगालोखबर 
विराटनगर । विराटनगरमा लुटपाट र अपहरणको घटनामा संलग्न भएको आरोपमा दुई जना पक्राउ परेका छन् । पक्राउ पर्नेमा विराटनगर-८ का २४ वर्षीय समीर हुसेन र विराटनगर-६ का २५ वर्षीय तासिब अन्सारी छन् । उनीहरू आइतबार पक्राउ परेका हुन् ।
‘हामी प्रहरी हौं’ भन्दै उनीहरूले असार ११ गते लुटपाट गरेको खुलेको छ । उक्त घटनामा संलग्न एक जना भने फरार छन् । मोरङ प्रहरीका अनुसार उनको खोजी भइरहेको छ ।
Advertisement
मोरङ प्रहरी प्रवक्ता डीएसपी कोपिला चुडालका अनुसार तीन जनाको समूहले विराटनगर-१५ का विक्रमकुमार साहलाई विराटनगर-१३ महतो टोलबाट अपहरण गरेका थिए ।
मोटरसाइकल र स्कुटरमा रहेका उनीहरूले विराटनगर आँखा अस्पताल छेउ हुँदै रेलवे लाइनमा पुर्याएर विक्रमसँग भएको रकम लुटेका थिए । विक्रमले विराटनगर-१५ का धर्मानन्द साहसँग तीन लाख ६४ हजार रुपैयाँ सापटी लिएर घरतर्फ फर्कँदै थिए ।
सोही क्रममा उनीमाथि लुटपाट भएको प्रहरीको भनाइ छ । यस सम्बन्धमा आवश्यक अनुसन्धान भइरहको डीएसपी चुडालले जानकारी दिइन् ।
