मोरङबाट ‘ह्‍युम पाइप’ मा लुकाएको ३४७ किलो गाँजासहित दुई जना पक्राउ

विराटनगर । मोरङको ग्रामथान गाउँपालिका-७ कलाबन्जार चोकबाट ‘ह्युम पाइप’ भित्र लुकाएर राखेको अवस्थामा गाँजा बरामद भएको छ । शङ्कास्पद दुई व्यक्तिलाई नियन्त्रणमा लिएर सोधपुछ गर्दा प्रहरीले तीन सय ४७ किलो गाँजा बरामद गर्न सफल भएको हो ।

पक्राउ पर्नेमा भारतको अररिया जिल्ला प्रर्वाहाका ३२ वर्षीय विकासकुमार साहु र मोरङको जहदा गाउँपालिका-५ का ३० वर्षीय राजेशकुमार कामत छन् । इलाका प्रहरी कार्यालय हरैँचाबाट खटिएको प्रहरी टोलीले मंगलबार राति ११ः४५ बजेतिर उनीहरूलाई नियन्त्रणमा लिएको थियो ।

प्रदेश १-०४-००१ प ०८३५ नम्बरको मोटरसाइकलमा सवार उनीहरूलाई मोटरसाइकल रोकेर बसेको अवस्थामा पक्राउ गरेको थियो । उनीहरूको बयानको आधारमा बुधबार दिउँसो खटिएको प्रहरी टोलीले गाँजा बरामद गरेको हो ।

प्रहरीका अनुसार उनीहरूलाई नियन्त्रणमा लिइएको स्थानबाट तीन सय मिटर उत्तर १२ वटा बोरामा प्याक गरेर लुकाएको अवस्थामा गाँजा फेला परेको थियो । उनीहरूका सम्बन्धमा आवश्यक अनुसन्धान भइरहेको प्रहरीले जनाएको छ ।