मोरङ । धम्क्याएर पैसा माग्ने दुई जनालाई जिल्ला प्रहरी कार्यालय मोरङले पक्राउ गरेको छ । मोरङको पथरीशनिश्चरे घर भई विराटनगर–४ कञ्चनबारी बस्दै आएका ३९ बर्षीय गणेश कुमार कार्की र पथरीशनिश्चरे–६ का २६ बर्षीय विशाल ऋषिदेवलाई प्रहरीले पक्राउ गरेको हो ।
Advertisement
उनीहरुले बिराटनगर–३ का मुकेश शर्मालाई पटक–पटक फोनबाट डर धम्की देखाई रकम माग गरेको आरोप छ । प्रहरीका अनुसार असार १७ गते सुक्रवार शर्माले मोरङको पथरीशनिश्चरे–६ हसन्दहमा रहेको रेमिट्यान्समा उनीहरुलाई पैसा पठाएका थिए । पैसा पठाएको जानकारी पाएपछि सो स्थानमा खटिएको प्रहरी टोलीले आइएमईमा पठाएको नगद २५ हजारसहित ऋषिदेवलाई पक्राउ गरेको हो ।
ऋषिदेव पक्राउ परेपछि यो बिषयमा संलग्न कार्कीलाई पनि प्रहरीले नियन्त्रणमा लिएको हो । उनीहरुको गतिविधिका बिषयमा थप अनुसन्धान भइरहेको जिल्ला प्रहरी कार्यालय मोरङले जनाएको छ ।
