बिराटनगर । मोरङ र पाँचथरका दुई छुट्टाछुट्टै स्थानमा आज भएका सवारी दुर्घटनामा दुई जनाको मृत्यु भएको छ । मोरङको कटहरी–४ मा ट्याक्टरले मोटरसाइकललाई ठक्कर दिदा एक जनाको मृत्यु हुँनुका साथै पाँचथरको कुम्मायक–४ वानथाकमा स्काभेटर पल्टिँदा चालकको मृत्यु भएको हो ।
Advertisement
दिउँसो सवा १२ बजे कटहरी–४ रंगेली सडक खण्डमा ट्याक्टरले मोटरसाइकललाई ठक्कर दिदा मोटरसाइकल चालक धनपालथान–७ का ६० बर्षीय मुस्तफी मियाको मृत्यु भएको छ । को २ त ६१२७ नम्बरको ट्याक्टरले को ३ प ३३०९ नम्बरको मोटरसाइकललाई ठक्कर दिदा मिया घाइते भएका थिए ।
उपचारका लागि विराटनगरस्थित न्यूरो अस्पताल पुर्याइएका उनको दिउँसो पौने १ बजे मृत्यु भएको जिल्ला प्रहरी कार्यालय मोरङले जनाएको छ । ठक्कर दिने ट्याक्टर र चालकलाई प्रहरीले नियन्त्रणमा लिएको छ ।
त्यस्तै, आज दिउँसो सवा १२ बजे पाँचथरको कुम्मायक–४ वानथाकस्थित मध्यपहाडी लोकमार्गमा स्काभेटर दुर्घटना हुँदा चालक दोलाखा तामाकोशी–३ पुरानोगाँउका २८ बर्षीय पवन महतको मृत्यु भएको छ ।
लोकमार्गमा ट्रयाक खन्ने क्रममा ना १ क ८३२१ नम्वरको स्काईभेटर चिप्लिएर ५ सय मिटर तल खस्दा चालक महतको घटनास्थलमै मृत्यु भएको जिल्ला प्रहरी कार्यालय पाँचथरले जनाएको छ ।
