बिराटनगर । धनकुटाका दुई महिला गाँजासहित बिराटनगरमा पक्राउ परेका छन् । पक्राउ पर्नेमा साँगुरीगढी गाउँपालिका–९ का ४० बर्षीया सीता राई र साँगुरीगढी गाउँपालिका–१ का २० बर्षीया बबिता राई छन् ।
Advertisement
१ नम्बर प्रदेश प्रहरी कार्यालय बिराटनगरको अनुसन्धान समूहले बिराटनगर महानगरपालिका–४ कञ्चनवारीबाट आज दिउँसो करिब १ बजे उनीहरुलाई पक्राउ गरेको हो ।
उनीहरुको साथबाट ५ किलो ७ सय ग्राम गाँजा बरामद भएको प्रहरीले जनाएको छ । प्रहरीका अनुसार सुनसरीको पकलीबाट गाँजा लिएर आएका उनीहरु टेम्पोबाट उत्रिएर पैदल हिड्दै गरेको अवस्थामा पक्राउ परेका हुन् । प्लाष्टिकले बेरेर पाँच वटा प्याकेट बनाई जेब्रा झोलामा राखेर लैजादै गरेको अवस्थामा गाँजा बरामद भएको हो ।
उनीहरु गाँजा लिएर कहाँ जाँदै थिए भन्ने खुल्न बाँकी छ । पक्राउ परेका दुवै जनालाई हिरासतमा राखेर उनीहरुको कारोबारका बिषयमा थप अनुसन्धान भईरहेको जिल्ला प्रहरी कार्यालय मोरङका डिएसपी मानबहादुर राईले संगालोखबरलाई जानकारी दिए । ‘प्रारम्भिक अनुसन्धानका क्रममा उनीहरुले गाँजा अरु स्थानमा पुर्याउँन भरियाको रुपमा काम गरेको बुझिएको छ ।’ डिएसपी राईले भने–‘यो बिषयमा हामी थप अनुसन्धान गर्दैछौ ।’
