भोजपुर । भोजपुरमा थप पाँच जनामा कोरोना संक्रमण पुष्टि भएको छ । नेपाल प्रहरी र थुनुवाका साथै राष्ट्रिय बाणिज्य बैंकका कर्मचारीमा कोरोना संक्रमण देखिएको हो । कोरोना पुष्टि भएकाहरुमा ३३, २८, २७, ३९ र ४९ वर्षिया पुरुष छन् ।
जिल्लाका एक सय एक जनाको स्वाव संकलन गरी धरानस्थित वीपी कोईराला स्वास्थ्य विज्ञान प्रतिष्ठानमा पीसीआर परीक्षण गर्दा पाँच जनाको रिपोर्ट पोजिटिभ आएको सहायक प्रमुख जिल्ला अधिकारी रामप्रसाद लुईटेलले जानकारी दिए ।
यसअघि बैङ्कका कर्मचारी, हिरासतमा रहेका थुनुवा र होल्डिङ एरियामा रहेका भोजपुर १२ का २८ वर्षिय पुरुष, षडानन्द नगरपालिका ६ का २२ वर्षिय पुरुष र टेम्केमैयुङ गाउँपालिका २ का २१ वर्षिय पुरुषमा संक्रमण पुष्टि भएको थियो । योसँगै भोजपुरमा कोरोना संक्रमितको संख्या २५ पुगेको छ । जसमध्ये ६ जना निको भईसकेका छन् ।
जिल्लामा थप संक्रमण फैलिन नदिन प्रशासनले एक हप्ताका लागि गरेको लकडाउन समयावधि आज सकिदै छ । पुनः लकडाउन गर्ने नगर्ने बारेमा जिल्ला संकट व्यवस्थापन समितिको बैठकको निर्णय गर्ने जिल्ला प्रशासन कार्यालय भोजपुरले जनाएको छ ।