काठमाडौं । धनकुटाको सहिदभूमी गाउँपालिका–२ छिन्ताङकी मृगौलापीडित अम्मल राईलाई आर्थिक सहयोग प्राप्त भएको छ । काठमाडौंमा बस्दै आएका धनकुटेलीहरुले सहयोग संकलन गरी १ लाख २० हजार रकम मृगौलापीडित राईलाई प्रदान गरेका हुन् ।
Advertisement
खोकुका नन्दकुमार राईको संयोजकत्वमा निर्माण गरिएको आर्थिक सहयोग संकलन समितिले ‘अम्मल राई बचाउँ अभियान’ सञ्चालन गरी आर्थिक संकलन गरेको हो । बिभिन्न व्यक्तिहरुबाट संकलित उक्त रकम समिति संयोजक राईले बिरामीलाई हस्तान्तरण गरेका हुन् ।
दुबै मृगौला फेल भएकी २३ बर्षीया राई अहिले उपचारका क्रममा ललितपुरमा छन् । सहयोग संकलन समितिका पदाधिकारीहरु ललितपुरस्थित निवासमै पुगेर बिरामीलाई रकम प्रदान गरेका हुन् । १० बर्षअघिदेखि मृगौलासम्बन्धि समस्यासँग जुध्दै आएकी राईलाई ललितपुरको सुमेरु अस्पतालमा नियमित डायलाईसिस गराईदै आएको छ ।
मृगौलापीडित अम्मलकी दिदी सृजनाले उनलाई एउटा मृगौला दिने भएकी छन् । तर, आर्थिक अभावका कारण मृगौला प्रत्यारोपण हुन सकेको छैन ।
मृगौला प्रत्यारोपणका लागि डाक्टरले ६ लाख रकम जुटाउँन भनेका छन् । निम्न आर्थिक अवस्थाको राई परिवारले रकम जुटाउँन नसक्दा मृगौला प्रत्यारोपण हुन नसकेको हो । पैसा नपुगेकै कारणले मृगौला प्रत्यारोपण हुन नसकेकाले आर्थिक सहयोग गरेर अम्मलको ज्यान बचाईदिन उनको परिवारले अपिल गरेको छ ।
