विराटनगर । प्रदेश १ का सामाजिक विकास मन्त्री जीवन घिमिरेको पीसीआर रिपोर्ट पुनः पोजिटिभ आएको छ । कोरोनाको लक्षण देखिएको दुईसातापछि गरिएको पीसीआर परीक्षण रिपोर्ट आज पुनः पोजिटिभ आएको प्रदेश जनस्वास्थ्य प्रयोगशालाले जनाएको छ ।
Advertisement
स्वास्थ्य अवस्था सामान्य हुँदै गएको र कोरोनाको लक्षणहरु हराउँदै गएकाले पुनः परीक्षण गरिएको थियो ।
मन्त्री घिमिरेलाई रुघाखोकी, जिउदुख्ने लक्षणबाहेक डाईरिया, टाउको दुख्ने, ज्वरो जस्ता समस्या समाधान हुँदै गएको भएपनि संक्रमणपछिको दोस्रो पीसीआर रिपोर्ट पनि पोजिटिभ आएको प्रमुख स्वकीय सचिव तिलकबहादुर बस्नेतले जानकारी दिए । वस्नेतका अनुसार मन्त्री घिमिरेको रक्तचाप र अक्सिजनको मात्रा सामान्य छ ।
मन्त्री घिमिरेलाई भदौ १५ गते कोरोना संक्रमण पुष्टि भएको हो । संक्रमण पुष्टि हुनुअघिदेखि नै घिमिरेलाई सामान्य लक्षणहरु देखिएको थियो । लक्षण देखिएपछि भदौ १३ गते साँझदेखि नै मन्त्री घिमिरे होम आईसोलेसनमा छन् ।
