विराटनगर । बिराटनगर महानगरपालिकामा आगामी १४ दिनका लागि लकडाउन घोषणा गरिएको छ । कोरोना संक्रमितको संख्या बढेपछि महानगरपालिकाले शनिबार राती १२ बजेदेखि दुई हप्ताका लागि लकडाउन घोषणा गरेको हो ।
लकडाउन घोषणा गरेर अत्यावश्यक सेवाबाहेक बजार पसल र आवतजावतमा रोक लगाईएको महानगरपालिकाका प्रमुख भीम पराजुलीले जानकारी दिए । उनका अनुसार लकडाउनको प्रोटोकल महानगरले जारी गर्नेछ ।
विराटनगरमा समुदायस्तरमै कोरोना संक्रमित भेटिने क्रम बढ्दै गएपछि संक्रमण रोकथामका लागि महानगरले लकडाउन घोषणा गरेको हो । शुक्रबार मात्रै बिराटनगरमा १० जना कोरोना संक्रमित थपिएका छन् । हालसम्म बिराटनगर महानगरपालिकामा कोरोना संक्रमितको संख्या १०९ पुगेको छ ।