भोजपुर । भोजपुरका कोरोना संक्रमित व्यक्तिलाई उपचारका लागि बिराटनगर लगिने भएको छ । हतुवागढीका २६ वर्षीय कोरोना संक्रमित पुरुषलाई कोरोना बिशेष अस्पतालमा राखेर उपचार गर्न बिराटनगर पठाउँन लागिएको हो ।
उनलाई उपचारका लागि लैजान सदरमुकामबाट एम्बुलेन्स पठाइसकिएको भोजपुरका प्रमुख जिल्ला अधिकारी बसन्तराज पुरीले संगालोखबरलाई जानकारी दिए । ‘आज साँझ सम्म बिराटनगर पुर्याउँनेगरी तयारी गरेका छौ ।’ प्रजिअ पुरीले भने ‘अरु व्यक्तिलाई संक्रमण नफैलिओस भनेर सावधानीपूर्वक लैजाने व्यवस्था मिलाइएको छ ।’
संक्रमित व्यक्तिलाई भोजपुरको एम्बुलेन्सले हतुवागढीबाट त्रिवेणी चुहार पुर्याउँछ । त्यसपछि बिराटनगरबाट आउँने एम्बुलेन्समा राखेर उनलाई लगिने छ ।
साउदीबाट फागुन ३० गते काठमाण्डौं आएका उनी चैत ११ गते हतुवागढी पुगेका थिए । हतुवागढीमा होम क्वारेनटाइनमा रहेका बेला मंगलबार गरिएको आरडीटी परीक्षणमा पोजिटिभ रिपोर्ट आएपछि उनलाई प्राथमिक स्वास्थ्य केन्द्र घोडेटारको आइसोलेसनमा राखिएको थियो । बीपी कोइराला स्वास्थ्य बिज्ञान प्रतिष्ठानमा बिहिबार ‘स्वाब’ परीक्षण गर्दा उनमा कोरोना संक्रमण पुष्टि भएको हो ।
उनीसहित नेपालमा कोरोना संक्रमित ४८ पुगेका छन् ।
यसअघि प्रकाशित समाचार…