संगालोखबर 
विराटनगर । नेपाल उद्योग परिसङ्घ कोशी प्रदेशले राष्ट्रिय स्तरको वमन लिडरसिप समिट आयोजना गर्ने भएको छ । कोशी प्रदेश सरकार, सामाजिक विकास मन्त्रालय र विराटनगर महानगरपालिकासँगको सहकार्यमा सङ्घले वमन लिडरसिप समिट २०२६ आयोजना गर्न लागेको हो ।
Advertisement
आयोजकले आज पत्रकार सम्मेलन गर्दै बैशाख २१ गते विराटनगरको होटल मनास्लुमा बिहान ९ देखि साँझ ५ बजेसम्म सम्मेलन हुने जानकारी दिएको छ । सीएनआई वमन लिडरसिप फोरम काठमाडौं तथा सीएनआई कोशी प्रदेश महिला उद्यम समितिको संयोजनमा हुन लागेको कार्यक्रमको उद्घाटन कोशी प्रदेशका मुख्यमन्त्री हिक्मतकुमार कार्कीले गर्ने तय भएको छ ।
सम्मेलनमा आर्थिक, औद्योगिक, बैंकिङ, राजनैतिक तथा सामाजिक क्षेत्रका व्यक्तिहरूको प्रस्तुती रहने महिला उद्यम समिति संयोजक रचना राठीले जानकारी दिइन् । ‘दिगो समृद्धितर्फः कृषि, सीप, सिर्जनशीलता र डिजिटल नवप्रवर्तन’ विषयमा केन्द्रित भएर सम्मेलन सञ्चालन हुने उनले बताइन् ।
सम्मेलनमा महिला उद्यमीहरूको प्रेरणादायी सफलताका कथा प्रस्तुतीसँगै फोनपे सहित नवप्रवर्तक सम्बन्धी छलफल, स्वदेशी बस्तुहरूको प्रदर्शन लगायत हुनेछन् । सम्मेलनले कोशी प्रदेश तथा नेपालभरका महिला उद्यमीहरू, नीति निर्माता, विकास साझेदार, वित्तीय संस्था तथा उद्योगी व्यवसायीहरूलाई एकै ठाउँमा ल्याइ समावेशी आर्थिक वृद्धि र दिगो समृद्धिको मार्ग तय गर्ने विश्वास लिइएको नेपाल उद्योग परिसंघ कोशीका अध्यक्ष पवन कुमार सारडाले जानकारी दिए ।
१७ वटा स्टल रहने सम्मेलनमा ३ सय बढीले सहभागिता जनाउने आयोजकले जनाएको छ ।
