उर्लाबारीमा जंगली च्याउ खाँदा एकै परिवारका पाँच जना बिरामी

विराटनगर । मोरङको उर्लाबारी नगरपालिका-१ मा जंगली च्याउ खाँदा पाँच जना बिरामी परेका छन् । मेचेडाँगीका ६९ वर्षीय लालबहादुर खड्काको परिवारका पाँच जना सदस्यहरू बिरामी परेका हुन् ।

प्रहरीका अनुसार उनीहरूले आइतबार जंगलबाट टिपेर ल्याएको च्याउ तरकारी बनाएर खाएका थिए । उनीहरू आइतबार राति बिरामी परेका प्रहरीको भनाइ छ ।

६९ वर्षीय लालबहादुरसहित उनकी पत्नी ६८ वर्षीया पवित्रा खड्का, छोराहरू ४२ वर्षीय शेरबहादुर, ३८ वर्षीय जंगबहादुर र बुहारी २४ वर्षीया जानुका खड्का बिरामी परेका प्रहरीले जनाएको छ ।

उनीहरूको झापाको दमकस्थित आम्दा अस्पतालमा उपचार भइरहेको छ । बिरामी परेकामध्ये शेरबहादुर र जानुकाको अवस्था मध्यम छ । अरुको अवस्था सामान्य रहेको प्रहरीले जनाएको छ ।