हराएको एक सातापछि खोलामा भेटियो केराबारीका वीरबहादुरको शव

विराटनगर । मोरङको केराबारी गाउँपालिका-२ का एक पुरुष मृत फेला परेका छन् । हराएको एक सातापछि ३६ वर्षीय वीरबहादुर लिम्बूको शव फेला परेको हो ।

केराबारी-२ स्थित समेवा खोलामा बुधबार साँझ उनको शव फेला परेको प्रहरीले जनाएको छ । प्रहरीका अनुसार लिम्बू असार १३ गतेदेखि सम्पर्कविहीन भएका थिए । हराएका लिम्बूलाई प्रहरी र आफन्तले खोजतलास गरिरहेका थिए ।

Advertisement

खोजी गर्ने क्रममा खोलामा शव फेला परेको प्रहरीले जनाएको छ । शवलाई पोस्टमार्टमका लागि बीपी कोइराला स्वास्थ्य विज्ञान प्रतिष्ठान धरान लगिएको छ । मृत्युको कारण खुल्न बाँकी छ । प्रहरीले घटनाका सम्बन्धमा आवश्यक अनुसन्धान अघि बढाएको छ ।