रंगेलीमा पिकअप दुर्घटना हुँदा चालकको मृत्यु

विराटनगर । मोरङको रंगेली नगरपालिका-७ संसारीमाई स्थानमा पिकअप दुर्घटना हुँदा चालकको मृत्यु भएको छ । प्रहरीका अनुसार पिकअप चालक विराटनगर-८ का ४५ वर्षीय चेतराज खनालको घटनास्थलमै मृत्यु भएको हो ।

शनिबार करिब २ः४० बजे बोइलर कुखुराको दाना बोकेर विराटनगरबाट आमबारीतर्फ जाँदै गरेको को २ च १३०० नम्बरको पिकअप डिभाइडरमा ठोक्किएको थियो ।

पिकअपमा सवार विराटनगर-८ कै २३ वर्षीय राम राजवंशी, २१ वर्षीय छत्र पराजुली र ३२ वर्षीय दिपेश पौडेल सकुशल रहेका प्रहरीले जनाएको छ । तीब्र गतिका कारण पिकअप दुर्घटना भएको प्रहरीको प्रारम्भिक अनुसन्धानबाट खुलेको छ । घटनाका सम्बन्धमा प्रहरीले थप अनुसन्धान गरिरहेको छ ।