धनकुटाबाट ब्राउन सुगरसहित चार जना पक्राउ

धनकुटा । धनकुटाबाट लागूऔषध ब्राउन सुगरसहित चार जना पक्राउ परेका छन् । सोमबार साँझ चौबिसे गाउँपालिका-६ राजारानीमा लागूऔषधको कारोबार भइरहेको भन्ने सूचनाका आधारमा खटिएको प्रहरी टोलीले उनीहरूलाई पक्राउ गरेको हो ।

प्रहरीका अनुसार २२ वर्षीय पुजन लिम्बुको घरमा सुतिरहेको अवस्थामा पुजनसहित २२ वर्षीय सेसेहाङ चेम्जोङ, २२ वर्षीय जेम्सन लिम्बु र ३७ वर्षीय दिनेश लिम्बु पक्राउ परेका हुन् ।

उनीहरूको साथबाट ३ ग्राम ९ सय मिलिग्राम ब्राउन सुगर, ४१ हजार पाँच सय नगद र चार थान मोबाइल बरामद भएको धनकुटा प्रहरीका निमित्त प्रवक्ता इन्स्पेक्टर धुव्र नारायण श्रेष्ठले जानकारी दिए । उनीहरूलाई जिल्ला प्रहरी कार्यालय धनकुटामा राखेर आवश्यक अनुसन्धान सुरु गरिएको छ ।