संगालोखबर 
विराटनगर । विराटनगर महानगरपालिकाले डिजिटल नागरिक बडापत्र सञ्चालनमा ल्याएको छ । आज मेयर नागेश कोइरालाले महानगर परिसरमा स्थापना गरिएको डिजिटल नागरिक बडापत्रको शुभारम्भ गरे ।
प्रमुख प्रशासकीय अधिकृत रामप्रसाद ढुङ्गेल, सामान्य प्रशासन महाशाखा प्रमुख अर्जुन थपलिया, भौतिक पूर्वाधार महाशाखा प्रमुख अर्जुन थापासहित विभिन्न महाशाखा र शाखा प्रमुखहरूको उपस्थितिमा डिजिटल नागरिक बडापत्रको शुभारम्भ गरिएको हो ।
Advertisement
बडापत्रमा महानगरपालिका तथा वडा कार्यालयमार्फत प्रवाह हुने सम्पूर्ण सेवाहरूका बारेमा जानकारी प्राप्त हुनेछ । महानगरपालिकाबाट सार्वजनिक हुने सूचना तथा समाचारहरू समेत बडापत्रमार्फत हेर्न सकिने आईटी शाखाकी इन्जिनियर अर्चना कर्णले बताइन् ।
उनका अनुसार मोबाइल चलाउन जान्ने सबैले बडापत्रमार्फत महानगरबाट प्रवाह हुने सेवासहित महानगरसँग सम्बन्धित अन्य जानकारीहरू प्राप्त हुनेछन् ।
बडापत्रमा सुन्ने र पढ्ने दुवै सुविधा उपलब्ध रहेको कर्णको भनाइ छ । मेयर कोइरालाले महानगरले प्रवाह गर्ने सबै सेवा र गतिविधिहरू पारदर्शी रूपमा हेर्न र बुझ्न सजिलो हुने बताए ।
