भेडेटारबाट २० किलो गाँजासहित दुई महिला पक्राउ

धनकुटा । धनकुटाको साँगुरीगढी गाउँपालिका-६ भेडेटारबाट २० किलो गाँजासहित दुई महिला पक्राउ परेका छन् । प्रहरीले आज बिहान चेकजाँचको क्रममा उनीहरूलाई फरक-फरक सवारीसाधनबाट नियन्त्रणमा लिएको हो ।

पक्राउ पर्नेमा सहिदभूमि गाउँपालिका-७ की ४९ वर्षीया सीता कार्की र ४२ वर्षीया इन्दिरा राई रहेका छन् ।

धनकुटा प्रहरीका प्रवक्ता डीएसपी ओमप्रकाश खनालका अनुसार कार्कीलाई बिहान करिब १०ः५० बजे अखुवाबाट धरानतर्फ जाँदै गरेको प्र.१-०२-००१ ख ८५२९ नम्बरको यात्रुबाहक बस चेकजाँच गर्दा १० किलो गाँजासहित पक्राउ गरिएको हो ।

त्यसैगरी ११ः२० बजे प्र.१-०२-००२ ज ४३३८ नम्बरको बोलेरो मार्फत धरान जाँदै गरेकी राईलाई पनि १० किलो गाँजासहित पक्राउ गरिएको डीएसपी खनालले जानकारी दिए । दुवै जनालाई नियन्त्रणमा लिएर थप अनुसन्धान भइरहेको प्रहरीको भनाइ छ ।