धनकुटाबाट कारमा राखेर लैजाँदै गरेको तीन सय किलो गाँजासहित एक जना पक्राउ

धनकुटा । धनकुटाको साँगुरीगढी गाउँपालिका–६ कामछेकबाट तीन सय किलो गाँजासहित गएराती एक जनालाई प्रहरीले पक्राउ गरेको छ । राती करिब ११ बजे भेडेटार–रवि राँके सडक खण्डमा को १ च ३४७८ नम्बरको कारमा राखेर लैजाँदै गरेको अवस्थामा गाँजा फेला परेको हो ।

गाँजा फेला परेपछि गाँजासहित कारमा सवार विराटनगर-१५ का २६ वर्षीय पृन्सकुमार शाहलाई नियन्त्रणमा लिइएको धनकुटाका प्रहरी प्रवक्ता डीएसपी ओमप्रकाश खनालले जानकारी दिए । ‘शंका लागेर कार चेक गर्दा कारभित्र तीन सय किलो गाँजा फेला परेको छ,’ डीएसपी खनालले संगालोखबरसँग भने, ‘कालो प्लाष्टिकमा ३० किलोका दरले १० वटा पोको पारेर राखेको अवस्थामा गाँजा भेटिएको छ ।’

इलाका प्रहरी कार्यालय भेडेटारबाट खटिएको प्रहरी टोलीले गाँजा बरामद गरेको हो । चेकजाँच गर्ने क्रममा कार चालक फरार भएको बताइएको छ । उनको खोजी भइरहेको प्रहरीले जनाएको छ ।