एमाले मोरङ निर्वाचन : पार्टी कार्यालयमा बिहीबार बिहानबाट मतगणना हुने

विराटनगर । नेकपा एमाले मोरङको नयाँ नेतृत्व चयनका लागि आज मतदान भएको छ । निर्वाचन अधिकृत डिल्लीराम घिमिरेका अनुसार निर्वाचनमा ९७ प्रतिशत मत खसेको छ ।

नौ सय ११ जना प्रतिनिधि भएपनि आठ सय ८८ जनाले मतदान गरेका उनले बताए । विराटनगर स्थित होटल मनास्लु इनमा मतदान भएपनि मतगणना विराटनगर स्थित पार्टी कार्यालयमा बिहीबार बिहानबाट सुरु हुने छ ।

अध्यक्षमा राजकुमार ओझा र अजम्बर राई, उपाध्यक्षमा शान्ति लिम्बू भुजेल र सागर थापा, सचिवमा रविन थापा र सोमराज थापा तथा उपसचिवमा शिल्पा निराला कार्की र इर्जालाल राजवंशी, सन्तोष बान्तवा र उषा झा (ठाकुर) प्रतिष्पर्धामा छन् ।

अधिवेशनमा तीन सय २५ जनाले मनोनयन दर्ता गराएका भएपनि ७१ जना निर्विरोध निर्वाचित भइसकेका छन् भने ६३ जनाले उम्मेदवारी फिर्ता लिएका थिए ।