उर्लाबारीमा मोटरसाइकलले ओभरटेक गर्दा ट्याक्टरले ठक्कर दियो, एक जनाको मृत्यु

विराटनगर । मोरङको उर्लाबारी नगरपालिका-७ मा ट्याक्टरले मोटरसाइकललाई ठक्कर दिँदा एक जनाको मृत्यु भएको छ । शनिबार पूर्व-पश्चिम राजमार्ग अन्तरगत दमकबाट उर्लाबारीतर्फ आउँदै गरेको को १ त ६७८८ नम्बरको ट्याक्टरले सोही दिशातर्फ आउँदै गरेको मे ६ प ६०७९ नम्बरको मोटरसाइकललाई ठक्कर दिएको थियो ।

दुर्घटनामा मोटरसाइकल चालक झापाको कमल गाउँपालिका-३ का ६२ वर्षीय धन्य प्रसाद बराल र सोही स्थानका ६५ वर्षीय तारानारायण श्रेष्ठ घाइते भएका थिए । उनीहरूलाई उपचारका लागि विएण्डसी अस्पताल बिर्तामोड लगिएकोमा श्रेष्ठको उपचारका क्रममा मृत्यु भएको प्रहरीले जनाएको छ ।

ट्याक्टर चालक उर्लाबारी नगरपालिका-३ का २८ वर्षीय शेखर खवासलाई नियन्त्रणमा लिएर प्रहरीले थप अनुसन्धान गरिरहेको छ । मोटरसाइकलले ओभरटेक गर्दा दुर्घटना भएको प्रहरीको प्रारम्भिक अनुसन्धानबाट खुलेको छ ।