संखुवासभा । संखुवासभाको पाचखपन नगरपालिका–३ मा श्रीमतीको हत्या गरेको आरोपमा श्रीमान पक्राउ परेका छन् । पक्राउ पर्नेमा स्थानीय दिपन राई छन् ।
Advertisement
सोमबार राती १२ बजे राईकी श्रीमती २९ बर्षीया बिष्णुमाया मृत अवस्थामा रहेको जानकारी पाएपछि ईलाका प्रहरी कार्यालय वानाबाट प्रहरी टोली खटिएको थियो । घटनास्थलमा खटिएको अनुसन्धान टोलीले प्रारम्भिक अनुसन्धानका क्रममा मृतकको शरीरमा चोट देखेपछि घटनाको विषयमा सुक्ष्म अनुसन्धान थालेको थियो ।
प्रहरी अनुसन्धानका क्रममा बिष्णुमायाको आत्महत्या, भवितव्यबाट मृत्यु नभई हत्या भएको खुलेपछि उनका श्रीमानलाई पक्राउ गरिएको हो । राईले आफैले श्रीमतीको हत्या गरेको साबिति बयान दिएका छन् । राईले श्रीमतीसँग सामान्य बिषयमा विवाद हुँदा आवेगमा आएर उनको हत्या गरेको प्रारम्भिक अनुसन्धानबाट खुलेको जिल्ला प्रहरी कार्यालय संखुवासभाले जनाएको छ ।
