विराटनगर । प्रदेश १ का मुख्यमन्त्री शेरधन राईले आज मुख्यमन्त्रीबाट राजीनामा दिने भएका छन् । मुख्यमन्त्री राईले आज विहान ११ बजेका लागि दलको बैठक बोलाइसकेका छन् ।
Advertisement
बैठक संसद सचिवालयस्थित एमाले संसदीय दलको बैठक हलमा बस्ने जनाइएको छ । सोही बैठकमा राईले दलको नेताबाट राजीनामा दिने र भीम आचार्यलाई दलको नेता चयन गरिने तयारी गरिएको छ ।
नेता चयनपछि मुख्यमन्त्री राईले प्रदेश प्रमुख समक्ष राजीनामा दिने, राजीनामा आजै स्वीकृत भएर दलको निर्णय अनुसार आचार्यलाई मुख्यमन्त्री चयनका लागि प्रदेश प्रमुख समक्ष सिफारिस गर्ने तयारी भएको एमाले स्रोतको भनाई छ । आचार्यले मुख्यमन्त्रीको सपथ आजै लिने तयारी भइरहेको जनाइएको छ ।
प्रदेश १ को कूल सांसद संख्या ९३ हो । सरकार बन्नका लागि चाहिने बहुमत संख्या ४७ हो । आजका दिनसम्म नेकपा एमालेसँग एकल बहुमत अर्थात् ५१ सांसद छन् । तर यीमध्ये पाँचजना सांसद मात्रै माधव नेपालको पक्षमा लागे भने एमालेको बहुमत गुम्ने निश्चित छ । मुख्यमन्त्री नियुक्त भइसकेपछि आचार्यले एक महिनाभित्र विश्वासको मत लिनुपर्ने हुन्छ ।
