धनकुटा । धनकुटाको महालक्ष्मी नगरपालिका–८ नुनथलामा हिउँमा चिप्लिएर तीन वटा गाडी दुर्घटना भएका छन् । सडकमा परेको अत्याधिक हिउँका कारण चिप्लिएर गएराती दुई वटा पिकअप र एउटा टिपर दुर्घटना भएको हो ।
Advertisement
हिउँमा चिप्लिएर तीन वटा गाडी दुर्घटना भएपनि मानवीय क्षति भने नभएको धनकुटाका प्रहरी प्रवक्ता डिएसपी सुरज कार्कीले संगालोखबरलाई जानकारी दिए । उनका अनुसार तेह्रथुमको बसन्तपुरबाट धनकुटाको सिधुवा आउँदै गरेको ना.४ च १८०६ नम्बरको पिकअप हिउँमा चिप्लिएर पल्टिएको छ । पिकअप सडकबाट करिब ५ मिटर तल खसेको भएपनि मानवीय क्षति भने भएको छैन ।
त्यस्तै, सिधुवाबाट तेह्रथुम जाँदै गरेको ना.८ ख ३९७१ नम्बरको टिपर पनि नुनथलामा दुर्घटना भएको छ । टिपर पल्टिँएर सडक ढाक्दा केही घण्टा सडक अवरुद्ध भएको थियो । तर, पछि टिपर हटाएर अवरोध खुलाइएको प्रहरीले जनाएको छ ।
यता, तेह्रथुमबाट सिधुवा आउँदै गरेको मे १ च ५०७० नम्बरको पिकअप पनि नुनथलामै दुर्घटना भएको छ । धनकुटाको उत्तरी क्षेत्रमा हिउँ परेर सडक ढाक्दा गाडी चिप्लिएर दुर्घटना भएको हो ।
