घोर्लिखर्कमा सेनाले गर्यो निःशुल्क स्वास्थ्य शिविर

धनकुटा । धनकुटाको पाख्रीबास नगरपालिका–५ घोर्लिखर्कमा नेपाली सेनाले निःशुल्क स्वास्थ्य शिविर सञ्चालन गरेको छ । वडा कार्यालयसँग सहकार्य गरेर सञ्चालन गरिएको शिविरमा ४ सय २८ जना बिरामीको स्वास्थ्य परिक्षण गरिएको आयोजक वरख गणले जनाएको छ ।

शिविरमा नेपाली सेनाका सहसेनानी डा. नरेन्द्र क्षत्री, जिल्ला अस्पतालका निमित्त मेडिकल सुपरिटेण्डेन्ट डा.पुजन विश्वकर्मा लगायत चिकित्सकहरुको टोलीले बिरामीको स्वास्थ्य परिक्षण गरेको थियो ।

बिरामीहरुलाई इसीजी, भिडियो एक्सरे, आँखा, दन्त लगायत परिक्षण गरी औषधि वितरण गरिएको वडाध्यक्ष गोपाल थापाले जानकारी दिए । यसैवीच सोहि कार्यक्रममा घोर्लिखर्कको जुनियर रेडक्रस सोसाईटीलाई औषधी हस्तान्तरणसमेत गरिएको छ ।