रास्वपा नेतृ तोसिमा कार्कीद्वारा धनकुटा अस्पतालको निरीक्षण

धनकुटा । पूर्व स्वास्थ्य राज्यमन्त्री एवं राष्ट्रिय स्वतन्त्र पार्टीकी नेतृ डा.तोसिमा कार्कीले आज बिहान धनकुटा जिल्ला अस्पतालको निरीक्षण गरेकी छन् । तेह्रथुम जाने क्रममा डा.कार्कीले धनकुटा जिल्ला अस्पतालको निरीक्षण गरेकी हुन् ।

निरीक्षणका क्रममा डा.कार्कीले जिल्ला अस्पतालको अवस्थाका बारेमा अस्पताल प्रमुख डा.अमिताभ ठाकुरसँग जानकारी लिएकी छन् । अस्पताल प्रमुख डा.ठाकुरले दरबन्दी, रक्त सञ्चार केन्द्र र स्वास्थ्य बीमाको हालको स्थितिबारे जानकारी गराए । सो क्रममा डा.कार्कीले स्वास्थ्य बीमा कार्यक्रमबाट कुनै पनि नागरिक वञ्चित हुन नपाउने गरी सेवा प्रवाह गर्न सुझाव दिएकी छन् ।

निरीक्षण भ्रमणका क्रममा कार्कीले अस्पतालमा उपचाररत बिरामीहरूसँग पनि भेटघाट गरी उनीहरूको स्वास्थ्य अवस्थाबारे जानकारी लिइन् । उनले बिरामीहरूको गुणस्तरीय स्वास्थ्य सेवामा पहुँच सुनिश्चित गर्न आवश्यक पहल गर्ने प्रतिबद्धता पनि व्यक्त गरेको रास्वपाका जिल्ला सभापति बालानन्द दाहालले जानकारी दिए ।