मोरङको कटहरीमा युवती बलात्कारको आरोपमा तीन जना पक्राउ

विराटनगर । मोरङको जहदा गाउँपालिका-३ की एक युवतीलाई बलात्कार गरेको आरोपमा प्रहरीले तीन जनालाई नियन्त्रणमा लिएको छ । हिजो बिहान ती युवतीलाई कटहरी-२ मा ल्याएर बलात्कार गरेको आरोपमा उनीहरू पक्राउ परेका हुन् ।

युवतीलाई बासँको झ्याङमा अचेत भेटेपछि स्थानीयले प्रहरीलाई खबर गरेका थिए । प्रहरीले युवतीको उद्धार गरेर उपचारका लागि कोशी अस्पताल ल्याएको थियो । अहिले उनको उपचार भइरहेको छ ।

युवतीले दिएको बयानका आधारमा उनीहरूलाई पक्राउ गरेर थप अनुसन्धान सुरु गरिएको मोरङ प्रहरीले जनाएको छ । पक्राउ परेकाहरूको नाम भने सार्वजनिक गरिएको छैन । ती युवती हात-खुट्टा बाँधिएको, मुखमा पट्टी लगाइएको र कपडाहरू च्यातिएको अवस्थामा फेला परेकी थिइन् ।