धनकुटामा ट्रक दुर्घटना हुँदा चालक घाइते

धनकुटा । धनकुटा-४ स्कुलडाँडामा ट्रक दुर्घटना भएको छ । हिजो राति करिब साढे नौ बजेको समयमा हिलेबाट धरानतर्फ जाँदै गरेको ना ६ ख १६५९ नम्बरको ट्रक दुर्घटना भएको हो ।

दुर्घटनामा ट्रक चालक छथरजोरपाटी गाउँपालिका-६ का ३३ वर्षीय प्रज्चल तामाङ घाइते भएका छन् । उनको कम्बरमा चोट लागेको जिल्ला प्रहरी कार्यालय धनकुटाले जनाएको छ ।

उनको अहिले जिल्ला अस्पताल धनकुटामा उपचार भइरहेको छ । गोलिया बोकेको ट्रक आफैँ अनियन्त्रित भएर सडकमा पल्टिएको जिल्ला ट्राफिक प्रहरी कार्यालय धनकुटाका प्रमुख सुरेन्द्र खड्काले जानकारी दिए ।

‘सडकमा नै ट्रक पल्टिएको थियो’, खड्काले संगालोखबरसँग भने, ‘राति नै ट्रकलाई हटाएर दुवैतर्फी सडक सञ्चालनमा आइसकेको छ ।’