संगालोखबर 
धनकुटा । धनकुटाको कागतेमा सुन्तला, एभोकाडो तथा फलफूल महोत्सव सुरु भएको छ । समृद्धि युवा क्लबको आयोजनामा स्थानीय उत्पादनलाई प्रबर्द्धन गर्ने उद्देश्यले महोत्सव गरिएको हो ।
धनकुटा नगरपालिकाका प्रमुख चिन्तन तामाङले महोत्सवको उद्घाटन गर्दै यसले स्थानीय उत्पादनको प्रवर्द्धन गर्नुका साथै कृषकहरूको आयआर्जनमा टेवा पुग्ने बताए । उनले स्थानीय पर्यटन प्रवर्द्धनका साथै फलफूलको बजार विस्तारमा महोत्सवले योगदान पुर्याउने उल्लेख गरे ।
Advertisement
महोत्सवले कृषिमा आधारित स्थानीय अर्थतन्त्रलाई सबल बनाउने र युवाहरूलाई उत्पादनशील क्षेत्रमा आकर्षित गर्ने वडा नम्बर ३ का वडाध्यक्ष विकास घिमिरेले बताए ।
उद्योग वाणिज्य सङ्घ धनकुटाका अध्यक्ष विजय सन्तोषी राईले महोत्सवले उद्योग र व्यवसायका लागि नयाँ सम्भावना उजागर गर्ने उल्लेख गरे । उनले यस्ता महोत्सवलाई निरन्तरता दिनुपर्नेमा जोड दिए ।
नेपाल पत्रकार महासङ्घ धनकुटाका अध्यक्ष बिदुर खवासले महोत्सवले स्थानीय उत्पादनको बजारीकरणमा सहयोग पुर्याउने बताए । पुस २० गतेसम्म सञ्चालन हुने महोत्सवले स्थानीय कृषकहरूका उत्पादनलाई बजारमा पुर्याउनुका साथै नयाँ सम्भावनाको खोजी गर्न सहयोग पुर्याउने आयोजकको विश्वास छ ।
महोत्सवमा सुन्तला, एभोकाडो र अन्य फलफूलको प्रदर्शनी र बिक्रीका स्टलहरू समावेश गरिएको छ । समृद्धि युवा क्लबको पहलमा स्थानीय सरकार र समुदायको सहकार्यमा महोत्सव आयोजना गरिएको क्लबका अध्यक्ष मोहन खानले बताए ।
