सुन्दरहरैँचामा हायसले ठक्कर दिँदा साइकलयात्रीको मृत्यु

विराटनगर । मोरङको सुन्दरहरैँचा नगरपालिका-५ दुलारीमा हायसको ठक्करबाट साइकलयात्रीको मृत्यु भएको छ । दुर्घटनामा सुन्दरहरैँचा-४ का ४४ वर्षीय चन्द्रकुमार राईको मृत्यु भएको प्रहरीले जनाएको छ ।

गम्भीर घाइते भएका उनलाई उपचारका लागि धरान स्थित बीपी कोइराला स्वास्थ्य विज्ञान प्रतिष्ठान घोपा लगिएको थियो । उनको उपचारका क्रममा मृत्यु भएको प्रहरीले जनाएको छ ।

पूर्वबाट पश्चिमतर्फ जाँदै गरेको बागमती प्रदेश ०८-००१ च ०४७ नम्बरको हायसले सडक क्रस गर्दै गरेको साइकललाई आज दिउँसो तीन बजेतिर ठक्कर दिएको थियो । हायस र चालक झापाको भद्रपुर नगरपालिका-८ का २६ वर्षीय विशाल दासलाई नियन्त्रणमा लिएको प्रहरीले जनाएको छ ।