क्यानाडा पठाइदिने भन्दै लाखौँ रुपैयाँ ठगेको आरोपमा झापाका युवक पक्राउ

काठमाडौँ । क्यानाडा पठाइदिने भन्दै सामाजिक सञ्जालमार्फत प्रलोभनमा पारेर लाखौँ रुपैयाँ ठगी गरेको आरोपमा झापाका एक युवक पक्राउ परेका छन् ।

झापाको बिर्तामोड नगरपालिका–९ घर भई ललितपुरको चाङथली बस्ने २३ वर्षीय पुरुषोत्तम भण्डारीलाई प्रहरीले पक्राउ गरेको हो । उनलाई काठमाडौँ उपत्यका अपराध अनुसन्धान कार्यालय टेकुबाट खटिएको टोलीले काठमाडौँको कोटेश्वरबाट पक्राउ गरेको हो ।

प्रहरीका अनुसार भण्डारीले क्यानाडा लैजाने भनेर प्रलोभनमा पारेर विभिन्न व्यक्तिका नाममा भएका बैङ्क खाताहरूमा पटकपटक गरी ८४ लाख १५ हजार ६२५ रुपैयाँ पठाउन लगाएर ठगी गरेका छन् ।

पक्राउपछि उनलाई ठगीसम्बन्धी कसुरमा आवश्यक कारबाहीका लागि जिल्ला प्रहरी परिसर काठमाडौँ पठाइएको प्रहरीले जनाएको छ ।