विराटनगर । मोरङको रंगेली नगरपालिका–२ की २१ महिने बालिकाको हत्या गरेको आरोपमा दुई जना पक्राउ परेका छन् । पक्राउ पर्नेमा स्थानीय ४६ बर्षीय सैनी उरावँ र उनकी २५ बर्षीया श्रीमती संगीता छन् । उनीहरू नातामा मृतक बालिकाका फुपू–फुपाजु पर्दछन् ।
Advertisement
स्थानीय चन्द्र उराँवकी २१ महिने छोरी युनिशाको हत्या गरी खाडल खनेर पुरेको आरोपमा दुबै जनालाई पक्राउ गरिएको हो । उनीहरुविरुद्ध सोमबार मोरङ अदालतमा कर्तव्य ज्यान मुद्दामा ७ दिनको म्याद थप गरी अनुसन्धान सुरू गरेको प्रहरीले जनाएको छ ।
युनिशा मंसिर २६ गते घरबाट हराएकी थिइन् । हराएको तीन दिनपछि घरदेखि करिब १ सय मिटर टाढा २ फिट गहिरो खाडलभित्र उनको शव भेटिएको थियो । खाल्डोमा कपडा पनि भेटिएको थियो । कपडा भेटिएपछि प्रहरीले अनुसन्धान थालेको हो ।
प्रारम्भिक अनुसन्धानबाट घटनामा संलग्न आफन्त नै रहेको खुलेपछि उनीहरुलाई पक्राउ गरिएको प्रहरीले जनाएको छ । बालिकाको हत्या गर्नुको कारण खुलिनसकेको प्रहरीको भनाई छ ।
