संगालोखबर सम्बाददाता 
विराटनगर । प्रदेश नं १ को नामाकरणका लागि मुख्यमन्त्री शेरधन राईले छलफल थालेका छन् । प्रदेश सभामा प्रतिनिधित्व गर्ने दलका नेताहरुसँग मुख्यमन्त्री राईले नामाकरणको विषयमा परामर्श थालेका हुन् ।
Advertisement
चालू अधिवेशनबाटै प्रदेशको नाम राख्न मुख्यमन्त्री राईले पहलकदमी थालेको मुख्यमन्त्री कार्यालय स्रोतले जनाएको छ । मुख्यमन्त्री राईले दलका नेताहरुसँग प्रदेशको नामका लागि सहमति गरेर अगाडि बढ्नु पर्ने भन्दै छलफललाई तिब्रता दिएका छन् । प्रदेश सभामा प्रतिनिधित्व गर्ने नेपाली कांग्रेस, माओवादी केन्द्र लगायतका दलका नेताहरुसँग मुख्यमन्त्री राईले छलफल गरेका छन् ।
छलफलका क्रममा दलका नेताहरुले आ–आफ्नो पार्टीभित्र समान धारणा बनाएर अगाडि बढाउने बताएको मुख्यमन्त्रीका प्रेस सल्लाहकार ध्रुव सुवेदीले जानकारी दिए ।
