विराटनगर । विराटनगर महानगरपालिका–१७ मटेरुवा चोकबाट भारतीय रुपैयाँ र अमेरिकी डलरसहित दुई जना भारतीय नागरिक पक्राउ परेका छन् । पक्राउ पर्नेमा भारत उत्तर प्रदेश लखनउका ३४ बर्षीय अतुल कुमार र ३५ बर्षीय सन्दिप सिंह रोय छन् ।
Advertisement
जिल्ला प्रहरी कार्यालय मोरङबाट खटिएको प्रहरी टोलीले शुक्रबार दिउँसो १ बजे उनीहरुलाई पक्राउ गरेको हो । भारतबाट नेपालतर्फ आउँदै गरेका उनीहरुलाई चेकजाँच गर्दा भारतीय रुपैयाँ २ लाख ८ हजार ५ सय र २ हजार २ सय १४ अमेरिकी डलर फेला परेको प्रहरीले जनाएको छ ।
भारतीय नोट ५०० को ४ सय १७ थान, अमेरिकन नोट १०० को २१ थान, २० को ५ थान, १० को १ थान र १ को ४ थान बरामद भएको हो । पक्राउ परेका दुवै जनालाई आवश्यक कारबाहीका लागि आन्तरिक राजश्व कार्यालय इटहरी पठाईएको जिल्ला प्रहरी कार्यालय मोरङले जनाएको छ ।
