सुनसरी । सुनसरीको धरान उपमहानगरपालिका–६ तीनकुनेस्थित जंगलबाट लागूऔषधसहित धनकुटाका दुई युवा पक्राउ परेका छन् । पक्राउ पर्नेमा धनकुटा नगरपालिका–६ का २१ बर्षीय सुमन कार्की र धनकुटा नगरपालिका–९ का २१ बर्षीय सुदिप राई छन् ।
Advertisement
ईलाका प्रहरी कार्यालय धरानबाट खटिएको प्रहरी टोलीले मंगलबार बेलुका करिब ७ बजे उनीहरुलाई पक्राउ गरेको हो । इटहरीबाट धरानतर्फ आउँदै गरेको उनीहरु सवार प्र १–०६–००१ प ००१८ नम्बरको मोटरसाइललाई चेकजाँच गर्दा लागुऔषध फेला परेपछि प्रहरीले दुवै जनालाई पक्राउ गरेको हो ।
उनीहरुको साथबाट लागूऔषध डाइजेल्याप ५ एम्पुल, लुपिजेसिक ५ एम्पुल, एभिल ५ एम्पुल र फेनर्गन ५ एम्पुल बरामद भएको प्रहरीले जनाएको छ । लागुऔषध बरामद भएपछि मोटरसाइकलसहित दुवै जनालाई प्रहरीले नियन्त्रणमा लिएर कारबाही प्रकृया अघि बढाएको छ ।
