धनकुटा । धनकुटाबाट लागुऔषध खैरो हेरोइनसहित दुई जना पक्राउ परेका छन् । पक्राउ पर्नेमा धनकुटा नगरपालिका–१ हिलेका २७ बर्षीय पेम्वा शेर्पा र छथरजोरपाटी गाँउपालिका–२ जोरपाटीका २२ बर्षीय फुर्वा शेर्पा छन् ।
Advertisement
जोरपाटीस्थित कोशी राजमार्गमा सोमवार दिउँसो सवारी चेकजाँच गर्ने क्रममा को ११ प ७७३१ नम्वरको मोटरसाइकलमा सवार उनीहरुको साथबाट खैरो हेरोइन बरामद भएको जिल्ला प्रहरी कार्यालयका प्रमुख गोविन्द अधिकारीले संगालोखबरलाई जानकारी दिए । हिलेबाट सिधुवातर्फ जाँदै गरेका उनीहरुको साथवाट ११ वटा प्याक बनाइएको खैरो हेरोइन बरामद भएको हो ।
उनीहरुले अन्य व्यक्तिलाई बिक्रिका लागि खैरो हेरोइन ओसारपसार गर्ने गरेको प्रहरीको प्रारम्भिक अनुमान छ । ‘सानो–सानो प्याकेटमा प्याक गरेर बोकेको अवस्थामा ब्राउनसुगर फेला परेको छ ।’ एसपी अधिकारीले संगालोखबरसँग भने–‘ब्राउनसुगरको प्याकेट हेर्दा उनीहरुले अन्य व्यक्तिलाई सप्लाई गर्ने गरेको जस्तो देखिन्छ । हामीले यो विषयमा थप अनुसन्धान गर्दैछौ ।’
पक्राउ परेका दुवै जनाविरुद्ध प्रहरीले मंगलबार जिल्ला अदालतमा लागुऔषध सम्बन्धि मुद्दा दायर गरेको छ । मुद्दा दायर गरी अदालतवाट म्याद थप गरेर प्रहरीले उनीहरुको कारोवारका बिषयमा अनुसन्धान गरिरहेको छ ।
