बिराटनगर । मोरङ र खोटाङका दुई छुट्टाछुट्टै स्थानमा आज बिहान भएका सवारी दुर्घटनामा दुई जनाको मृत्यु भएको छ । मोरङको कटहरी गाउँपालिका–३ मा तेल बोेक्ने ट्याङ्करको ठक्करबाट मोटरसाइकल चालक स्थानीय २१ बर्षीय रोहित साहको मृत्यु भएको हो ।
Advertisement
आज बिहान करिव सवा ९ बजे पूर्वबाट पश्चिमतर्फ जाँदै गरेको प्रदेश १–०२–०४२ प.९५५९ नम्बरको मोटरसाइकललाई सोहि दिशाबाट जाँदै गरेको ना.५ ख.८४३४ नम्बरको तेल बोक्ने ट्याङकरले ठक्कर दिँदा साह घाइते भएका थिए । उपचारका लागि विराटनगरस्थित कोशी अस्पताल पुर्याइएका उनको उपचारकै क्रममा मृत्यु भएको जिल्ला प्रहरी कार्यालय मोरङले जनाएको छ ।
त्यस्तै खोटाङको रावाबेशी गाउँपालिका–१ डुम्रेपानीमा आज बिहान करिव साढे ३ बजे को.७ त.४७२७ नम्बरको ट्याक्टर दुर्घटना हुँदा ट्याक्टरका सह–चालक स्थानीय २६ बर्षीय राजन नेपालीको मृत्यु भएको छ । पार्किङ गरेर राखेको ट्याक्टरलाई सह–चालकले चलाएर लैजाने क्रममा सडकबाट करिब ५० मिटर तल खसेको हो ।
दुर्घटनामा घाइते भएका नेपालीको स्थानीय मेडिकलमा उपचार हुँन नसकेपछि थप उपचारका लागि लैजादै गर्दा बिहान करिव साढे ७ बजे मृत्यु भएको जिल्ला प्रहरी कार्यालय खोटाङले जनाएको छ ।
