सुनसरी । सुनसरीको कोशी गाउँपालिकाबाट लागुऔषधसहित दुई जना भारतीय नागरिक पक्राउ परेका छन् । कोशी–७ हरिपुरस्थित भित्रीसडक खण्डबाट भारत सुपौल ग्राम पंचायत–१ का २० बर्षीय लक्ष्मणकुमार पासवान र १९ बर्षीय अर्जुनकुमार पासवानलाई प्रहरीले पक्राउ गरेको हो ।
Advertisement
जिल्ला प्रहरी कार्यालय सुनसरीबाट गस्तीमा खटिएको प्रहरी टोलीले उनीहरुलाई नियन्त्रणमा लिएको हो । नियन्त्रणमा लिई शरीर खानतलासी गर्दा कालो प्लाष्टिकमा लुकाएर राखेको अवस्थामा ८ ग्राम ५८० मिलिग्राम ब्राउनसुगर फेला परेको हो ।
प्रहरीले उनीहरुको साथबाट भारतीय रुपैयाँ १ हजार २ सय ५० र भारतका विभिन्न बैंकका एटिएम कार्डसमेत बरामद गरेको छ । उनीहरुको कारोबारका बिषयमा थप अनुसन्धान भईरहेको जिल्ला प्रहरी कार्यालय सुनसरीले जनाएको छ ।
