सोलुखुम्बु । सोलुखुम्बुको महाकुलुङ गाँउपालिकामा ढुंग्रीले हानेर छोराले बाबुको हत्या गरेका छन् । महाकुलुङ–४ का १९ बर्षीय कुबेर राईले घरायसी विवादमा आफ्नै बाबु ५७ बर्षीय सन्तकुमार राईको हत्या गरेको प्रहरीले जनाएको छ ।
बाबु छोराबीच बिहिबार राती विवाद भएको थियो । विवादका क्रममा झगडा हुँदा कुबेरले बाबुलाई आगो फुक्ने फलामको ढुंग्रीले टाउकोमा प्रहार गर्दा उनको घटनास्थलमै मृत्यु भएको हो ।
Advertisement
आफन्तले घटनाको बिषयमा जानकारी दिएपछि आज बिहान जिल्ला प्रहरी कार्यालय र ईलाका प्रहरी कार्यालय सोताङबाट प्रहरी टोली घटनास्थल गएको थियो ।
प्रहरीले बाबुको हत्या आरोपमा कुबेरलाई पक्राउ गरेको छ । घटनाको बिषयमा अनुसन्धान गरेर कारबाही प्रकृया अघि बढाईएको जिल्ला प्रहरी कार्यालय सोलुखुम्बुले जनाएको छ ।
