खोटाङमा छिमेकीले खुकुरी प्रहार गर्दा श्रीमानको मृत्यु, श्रीमती घाईते

खोटाङ । खोटाङको केपिलासगढी गाउँपालिका–२ खार्ताम्छामा आज छिमेकीले खुकुरी प्रहार गर्दा एक जनाको मृत्यु भएको छ । एक जना घाईते भएका छन् ।

बिहान पौने ९ बजे स्थानीय ३६ बर्षीय शुभराज राईले छिमेकी ६५ बर्षीय डिल्लीराज राई र उनकी श्रीमती ६२ बर्षीया सममाया राईलाई खुकुरी प्रहार गरेका हुन् । खुकुरी प्रहारबाट गंभीर घाईते भएका दुवै जनालाई उद्धार गरेर उपचारका लागि हेलिकप्टर मार्फत काठमाडौं पठाउँने तयारी गर्दैगर्दा डिल्लीराजको मृत्यु भएको जिल्ला प्रहरी कार्यालय खोटाङका प्रमुख डीएस्पी नारायण प्रसाद चिमरियाले संगालोखबरलाई जानकारी दिए ।

यता, घाईते सममायालाई उपचारका लागि कैलाश एयरको हेलिकप्टर मार्फत काठमाडौं पठाईएको छ । घटनाको जानकारी पाएपछि प्रहरी चौकी खार्ताम्छाबाट प्रहरी टोली घटनास्थल गएको थियो । खुकुरी प्रहार गर्ने शुभराजलाई प्रहरीले नियन्त्रणमा लिएको छ ।

शुभराजलाई पक्राउ गरेर घटनाको बिषयमा अनुसन्धान भईरहेकाले खुकुरी प्रहारको कारण खुल्न बाँकी रहेको डिएस्पी चिमरियाले बताए । ‘के कारणले खुकुरी प्रहार गरेको हो भन्ने यकिन भईसकेको छैन ।’ डिएस्पी चिमरियाले संगालोखबरसँग भने–‘घटनाको अनुसन्धान भईरहेको छ । कारण खुल्न बाँकी छ ।’