मृत मानिसको मुटु जिवितमा सार्ने चिकित्सक धितालले भने ‘नोबेललाई सहयोग गर्न तयार छु’

बिराटनगर। मृत व्यक्तिको मुटु जिवित व्यक्तिमा सफलतापूर्वक सारेर चर्चा कमाएका बरिष्ठ सर्जन डा.कुमुद धितालले ओपन हार्ट सर्जरीका लागि नोबेललाई सहयोग गर्न तयार रहेको बताएका छन् । नोबेल शिक्षण अस्पतालमा आयोजित अन्तरक्रियामा बोल्दै डा.धितालले यस्तो बताएका हुन् ।

पूर्वी नेपालका बिरामीहरुको उपचारको प्रमुख गन्तब्यको रुपमा रहेको नोबेलमा ओपन हार्ट सर्जरी सुरु गर्नुपर्ने आवश्यकता रहेको भन्दै उनले त्यसका लागि आफ्नो तर्फबाट सक्दो सहयोग गर्न तत्पर रहेको बताए । डा.धितालको उपस्थितीमा नोबेलमा अन्तरक्रिया गरिएको हो ।

कार्यक्रममा नोबेलका चिकित्सक, कर्मचारी लगायत सहभागि थिए । सोहि अवसरमा उनले नोबेल शिक्षण अस्पतालको अवलोकनसमेत गरेको नोबेल अस्पतालका निर्देशक एवं मुटु रोग बिशेषज्ञ डा.राजेश नेपालले जानकारी दिए ।

अष्ट्रेलियाको सेन्ट भिन्सेन्टस् हस्पिटलमा कार्यरत नेपाली चिकित्सक डा.धिताल नेतृत्वको टिमले विश्वमै पहिलो पटक मृत मानिसको मुटु सफलतापूर्वक जिवित मानिसमा सारेका थिए । सोहि बिषयले डा.धिताल स्वास्थ्य क्षेत्रमा चर्चित छन् ।