धनकुटा, ५ बैशाख । नेपालका लागि जापानी राजदुत मासाशी ओगावाले धनकुटा अस्पतालको स्तरोन्नतीका लागि सहयोग गर्ने प्रतिबद्धता जनाएका छन् ।
भोजपुरमा निमार्ण भएको आँखा अस्पताल उद्घाटन गर्न जाने क्रममा बुधबार धनकुटा अस्पतालको निरीक्षण गर्दै राजदुत ओगावाले यस्तो प्रतिवद्धता जनाएका हुन् ।
Advertisement
जापान सरकारले गर्ने सहयोग ठूलो परिमाणको हुने उनले बताए ।
राजदुताबासबाट हुने सहयोगका लागि जापान सरकारबाट अनुमति लिन आवश्यक नरहेकाले एक करोडसम्मको सहयोग राजदुताबासबाट जुनसुकै बेला गर्न सकिने उल्लेख गरे ।
अस्पतालमा आवश्यक एक्सरे मेसिन र प्रयोगशालाको स्तरोन्नतीमा तुरुन्तै सहयोग गर्न सकिने उनको संकेत छ ।
फरक प्रसंगमा राजदुत ओगावाले स्थानीय, प्रदेश र प्रतिनिधि सभा निर्वाचन शान्तिपूर्ण तरिकाले सम्पन्न भएकाले नेपालीलाई बधाई दिए ।
अहिले बनेको बलियो सरकारको कार्यकालमा नेपाल र जापानको सम्बन्ध अझ बलियो हुने विश्वास पनि ब्यक्त गरे । राजदुत ओगावासहित राजदुताबासकी कार्यक्रम अधिकृत इमाइ खावरी लगायतको टोलीले धनकुटा अस्पतालको निरीक्षण गरेको थियो ।
सो अवसरमा राजदुतावासको टोलीलाई जिल्ला अस्पतालको तर्फबाट स्वागत एवं सम्मान गरिएको थियो ।
