धनकुटा, २४ पुस । प्रादेशिक राजधानीको माग गर्दै धनकुटामा जारी आन्दोलनको स्वरुप परिवर्तन गरिएको छ । सोमबार अपरान्ह बसेको आन्दोलन परिचालन समितिको बैठकले आन्दोलनको रुवरुप परिवर्तन गरेको हो ।
सरकारले तत्काल प्रादेशिक राजधानी नतोक्ने देखिएपछि सर्वसाधरणको समस्यालाई मध्यनजर गर्दै आन्दोलनलाई सामान्यकरण गरिएको आन्दोलन परिचालन समिति संयोजक सुन्दरवावु श्रेष्ठले जानकारी दिएका छन् । उनका अनुसार मंगलबार दिउँसो १२ देखि १ बजेसम्म १ घण्टा धनकुटाको जिरोपईन्ट र हिलेमा चक्काजाम गरी मन्त्रालयको बोर्ड राखिएका कार्यालयमा सरकारी झण्डा गाड्ने निर्णय भएको छ ।
Advertisement
त्यस्तै बुधबार पनि १२ देखि १ बजेसम्म १ घण्टा चक्काजाम गरी साँझ मसाल जुलुश गरिनेछ । यता बिहिबार भने मन्त्रीपरिषद बैठक बस्ने भएकाले एकदिने जिल्ला बन्द आवहन गरिएको आन्दोलन परिचालन समितिले जनाएको छ । धनकुटालाई प्रादेशिक राजधानीको माग गर्दै बिगत २५ दिनयता निरन्तर प्रदर्शन भईरहेको छ ।
सरकारले बिराटनगरलाई प्रादेशिक राजधानी तोक्ने गरी खाका तयार गरेको समाचार सार्वजनिक भएपछि धनकुटाबासीले आमहड्ताल आवहन गरेका थिए । सरकारले माग संबोधनमा चासो देखाए आन्दोलन फिर्ता हुँने भएपनि माग संबोधनमा ध्यान नदिए आन्दोलन अझै चर्किने आन्दोलन परिचालन समिति संयोजक श्रेष्ठले बताएका छन् ।
