विराटनगर । मोरङ जिल्ला अदालतको नक्कली परिचय पत्र बनाएर ठगी गरेको आरोपमा दुई जना पक्राउ परेका छन् । उनीहरूमाथि सरकारी कार्यालयमा जागिर खुलेको विज्ञापन निकालेर दर्जनौं व्यक्तिमाथि ठगी गरेको आरोप छ ।
पक्राउ पर्नेमा सिराहाको लाहान घर भई विराटनगर-५ मा डेरा गरि बस्ने ५० वर्षीया पुनमदेवी साह र उनकी छोरी २७ वर्षीया कोमलकुमारी साह छन् ।
Advertisement
सासू आमाको नाममा बैंक खाता खोल्न लगाएर छोरी-ज्वाइँले ठगी गरेको प्रारम्भिक अनुसन्धानबाट खुलेको मोरङका प्रहरी प्रवक्ता डीएसपी कोपिला चुडालले जानकारी दिइन् । आमा-छोरी पक्राउ परेपनि ज्वाइँ फरार रहेकाले खोजी भइरहेको उनको भनाइ छ ।
‘अहिले चार जनाको जाहेरी लिएर अनुसन्धान अघि बढाएका छौं’, डीएसपी चुडालले संगालोखबरसँग भनिन्, ‘हाम्रो अनुमान अनुसार चार/पाँच सय जना नै ठगिनुभएको हुनसक्छ । थोरै-थोरै रकम धेरैजनासँग ठगेको अनुमान छ ।’
प्रहरीका अनुसार साहले पीडितलाई एसएमएसमार्फत धम्कीसमेत दिने गरेको खुलेको छ । उनीहरूले अदालतमा कार्यालय सहयोगीदेखि नायब सुब्बा पदसम्मका जागिर लगाइदिने भन्दै रकम असुल्दै आएको खुलेको छ ।
उनीहरूले २ हजार ५ सयदेखि ७ हजार ५ सय रुपैयाँसम्म रकम असुलेको पाइएको छ । यस विषयमा थप अनुसन्धान भइरहेको डीएसपी चुडालले जानकारी दिइन् ।
