सुनसरीबाट लागूऔषधसहित एक जना पक्राउ

सुनसरी । सुनसरीको इनरुवा नगरपालिका-४ बसपार्कबाट लागूऔषध ब्राउन सुगरसहित एक जना पक्राउ परेका छन् । पक्राउ पर्नेमा मोरङको बेलबारी नगरपालिका-४ का ४० वर्षीय इन्द्रबहादुर गुरुङ छन् ।

सुनसरीका प्रहरी प्रवक्ता डीएसपी योगराज खतिवडाका अनुसार उनको साथबाट १६ ग्राम तीन सय ५० मिलिग्राम ब्राउन सुगर बरामद भएको छ ।

विशेष सूचनाका आधारमा खटिएको प्रहरी टोलीले लौकहीबाट झुम्कातर्फ आउँदै गरेको बा ४६ प ८४०२ नम्बरको मोटरसाइकलमा सवार उनलाई चेकजाँच गर्दा लागूऔषध फेला परेको प्रहरीले जनाएको छ ।

पक्राउ परेका गुरुङलाई जिल्ला प्रहरी कार्यालय सुनसरीमा राखिएको छ । उनको सम्बन्धमा थप अनुसन्धान भइरहेको प्रहरीले जनाएको छ ।