संगालोखबर 
विराटनगर । विराटनगर महानगरपालिकाको समन्वयमा विराटेश्वर वृद्धाश्रमका ज्येष्ठ नागरिकको निःशुल्क स्वास्थ्य परीक्षण गरिएको छ ।
स्वास्थ्य कार्यालय मोरङको आयोजना तथा नोवेल मेडिकल कलेजको प्राविधिक सहयोगमा स्वास्थ्य परीक्षण गरिएको हो । महानगरको समन्वयमा विराटनगरभित्र सञ्चालित वृद्धाश्रम तथा मानव सेवा आश्रमलगायतमा निःशुल्क स्वास्थ्य शिविर राखिएको छ ।
Advertisement
आजबाट शिविरको पहिलो दिन विराटेश्वरमा ४७ जनाको स्वास्थ्य परीक्षण गरिएको स्वास्थ्य महाशाखाका तथ्याङ्क अधिकृत दीपक भट्टराईले जानकारी दिए ।
महानगरका अनुसार माघ १४ गते विराटनगर-३ स्थित मानव सेवा आश्रम, १५ गते ज्येष्ठ नागरिक समिति तथा योग ध्यान केन्द्र विराटनगर-११ मा शिविर सञ्चालन हुनेछ ।
यस्तै १८ गते विराटनगर-१३ स्थित पूर्वाञ्चल बालसेवा आश्रम, माघ २२ गते ज्येष्ठ नागरिक हातेमालो समाज विराटनगर-३ र २३ गते विराटनगर-१० स्थित मानव सेवा आश्रममा शिविर सञ्चालन हुनेछ ।
