मोरङमा प्रेमिकाले धोका दिएको भन्दै पुरुषले शरीरमा आगो लगाएपछि...

विराटनगर । मोरङमा एक पुरुषले प्रेममा धोका पाएको भन्दै आफ्नै शरीरमा पेट्रोल छर्किएर आगो लगाएका छन् । झापाको दमक नगरपालिका-७ घर भएका ४० वर्षीय विनोद थापाले शरीरमा आगो लगाएका हुन् ।

मोरङ प्रहरीका अनुसार थापाले आइतबार उर्लाबारी नगरपालिका-६ मा रहेको अन्नपूर्ण खाजा घर अगाडि गएर शरीरमा आगो लगाएका हुन् ।

थापाको विराट टिचिङ अस्पतालमा उपचार भइरहेको र अवस्था सामान्य रहेको मोरङ प्रहरीका प्रवक्ता डीएसपी वेद प्रकाश जोशीले संगालोखबरलाई जानकारी दिए ।

दमक नगरपालिका-३ घर भएकी २८ वर्षीय इन्द्र लिम्बुले अन्नपूर्ण खाजा घर संचालन गर्दै आएकी छन् । उनैले आफूलाई धोका दिएको आरोप लगाउँदै शरीरमा आगो लगाएको पाइएको डीएसपी जोशीले बताए ।

खाजा घरकी सञ्चालिका लिम्बुलाई सोधपुछ पछि परिवारको जिम्मा लगाइएको प्रहरीले जनाएको छ ।