धनकुटाको पाख्रीबासमा पिकअप दुर्घटना हुँदा दुई जनाको मृत्यु

धनकुटा । धनकुटाको पाख्रीबास नगरपालिका-३ जोउटारमा सुँगुर बोकेको पिकअप दुर्घटना हुँदा दुई जनाको मृत्यु भएको छ । पिकअप चालक पाख्रीबास नगरपालिका–९ उत्तरपानीका ३९ वर्षीय शुक्रबहादुर तामाङ र सह-चालक लहान नगरपालिका-५ सिराहाका २४ वर्षीय प्रमोद मल्लिकको मृत्यु भएको हो ।

मल्लिकको घटनास्थलमै मृत्यु भएको थियो । तामाङलाई जिल्ला अस्पताल धनकुटा पुर्‍याउनसाथ चिकित्सकले मृत घोषणा गरेका जिल्ला प्रहरी कार्यालय धनकुटाका प्रवक्ता डीएसपी ओमप्रकाश खनालले जानकारी दिए ।

बिहीबार राति करिब सवा ९ बजे पाख्रीबास आउँदै गरेको को १ ज २६३९ नम्बरको पिकअप सडकबाट करिब १५० मिटर तल खसेर दुर्घटना भएको हो । तीनवटा सुँगुर भने जीवितै रहेका छन् । शव पोष्टमार्टमका लागि जिल्ला अस्पताल धनकुटामा राखिएको छ ।

‘तीन वटा सुँगुर लिएर बोलेरो हिले तर्फ आउँदै थियो’, प्रवक्ता खनालले संगालोखबरसँग भने, ‘दुर्घटनाको कारण खुल्न बाँकी छ । थप अनुसन्धान भइरहेको छ ।’