धनकुटाबाट लागूऔषधसहित चार जना पक्राउ

धनकुटा । धनकुटाबाट लागूऔषध खैरो हेरोइनसहित चार जनालाई प्रहरीले पक्राउ गरेको छ । आइतबार दिउँसो छथर जोरपाटी गाउँपालिका-६ सिधुवा बजारबाट बसन्तपुरतर्फ जाँदै गरेको को २६ प ९२९० नम्बरको मोटरसाइकल चेकजाँच गर्ने क्रममा प्रहरीले दुई जनालाई पक्राउ गरेको हो ।

मोटरसाइकल चालक तेह्रथुमको लालिगुराँस नगरपालिका-२ बसन्तपुरका ३२ वर्षीय विकास श्रेष्ठ र मोटरसाइकल पछाडि सवार मेन्छयायेम गाउँपालिका-६ थाम्ब्रेनका २६ वर्षीय राजिव सम्ब्रहाम्फेलाई पक्राउ गरिएको प्रहरीले जनाएको छ ।

यस्तै उनीहरूलाई लागूऔषध बेच्ने धनकुटा नगरपालिका-१ हिलेका २५ वर्षीय केवल तामाङ र सोही स्थानका २८ वर्षीय सुजन तामाङलाई पनि नियन्त्रणमा लिएको धनकुटाका प्रहरी निरीक्षक विष्णु खड्काले जानकारी दिए ।

उनीहरूलाई आइतबार दिउँसो नै दिलबहादुर लिम्बुको भान्साघरमा बसेको अवस्थामा प्रहरी चौकी हिलेले नियन्त्रणमा लिएको हो । प्रहरी निरीक्षक खड्काका अनुसार चारैजनाको साथबाट २९० मिलिग्राम लागूऔषध बरामद गरिएको छ ।

अहिले चारैजनालाई म्याद थप गर्नका लागि जिल्ला अदालत धनकुटा लगिएको प्रहरी निरीक्षक खड्काले संगालोखबरलाई जानकारी दिए ।