सन्तोष सुवेदी/संगालोखबर 
धनकुटा । नेपालमा खोरेत रोगबाट वार्षिक ६ अर्ब बढीको क्षति हुने गरेको पाइएको छ । आज भेटेरिनरी अस्पताल तथा पशु सेवा विज्ञ केन्द्र धनकुटाले आयोजना गरेको जिल्लास्तरीय खोरेत रोग नियन्त्रण रणनीति कार्यान्वयन सम्बन्धी सरोकारवालाहरूसँगको छलफलमा सो कुरा बताइएको हो ।
पशुपक्षी तथा मत्स्य विकास निर्देशनालय विराटनगरका वरिष्ठ पशु विकास अधिकृत गङ्गाराम यादवले नेपालमा खोरेत रोगबाट वार्षिक ६ दशमलब ४४ अर्ब क्षति हुने गरेको जानकारी दिए ।
Advertisement
त्यस्तै खोरेत रोगबाट वार्षिक ३२ प्रतिशत दुग्धजन्य उत्पादन घाटा हुँदा अन्य देशमा निर्यातमा समस्या भएको उनले बताए । २०३० सम्ममा खोरेत रोग नियन्त्रण गर्न सङ्घ, प्रदेश र स्थानीय सरकार लागिपरेको उनको भनाइ छ ।
प्रदेश सांसद तथा पूर्वमन्त्री निरन राईले खोरेत रोग नियन्त्रणका लागि आफ्नो तर्फबाट खेल्नु पर्ने भूमिका खेल्ने बताए । खोरेत रोगले कृषकलाई समस्यामा पारेको बताउँदै यसको समाधानका लागि आफूले पनि पहल गरिरहेको उनको भनाइ थियो ।
धनकुटाका किसानले खोरेत रोग नियन्त्रणका लागि नियमित खोप कार्यक्रम सञ्चालन गर्न र प्राविधिक सहयोग बढाउन माग गरेका छन् । जिल्लास्तरीय खोरेत रोग नियन्त्रण रणनीति कार्यान्वयन सम्बन्धी स्थानीय सरोकारवालाहरूसँग छलफल कार्यक्रममा किसानले प्रभावकारी ढङ्गले काम गर्नुपर्ने बताएका हुन् ।
जसले गर्दा सहजताका साथ आफूले उत्पादन गरेको दुग्धजन्य पदार्थ बेच्न सहज हुने उनीहरूको भनाइ छ । धनकुटा नगरपालिकाका कृषक रामकुमारी राईले आफूले अपेक्षा गरे अनुसारका कार्यक्रम नपाएको बताइन् । उनले किसानको घर-घरमा खोरेत नियन्त्रणको अभियान चाल्नुपर्ने उल्लेख गरिन् । उनले वास्तविक किसानलाई अनुदान उपलब्ध गराउन समेत ध्यानाकर्षण गराइन् ।
छथर जोरपाटी गाउँपालिका-६ का कृषक युवराज थापाले खोरेत रोगका कारण ठूलो क्षति ब्यहोर्नु परेको सुनाए । चर्को ब्याजदरले किसान मारमा परिरहेको भएपनि दुग्धजन्य बस्तुले उचित मूल्य नपाएको उनको भनाइ थियो ।
कार्यक्रममा जिल्लाभरिका पशुपालक किसान, पशु चिकित्सक, स्थानीय जनप्रतिनिधि लगायतको उपस्थिति रहेको थियो । खोरेत रोगले पशुपालन क्षेत्रमा पार्ने प्रभाव र यसको रोकथामका लागि अपनाउनुपर्ने उपायहरू बारे विस्तृत छलफल भएको छ ।
