संगालोखबर 
धनकुटा । धनकुटाको भेडेटारमा सम्पन्न १२ औं फुड फेस्टिभल अर्थात खाना महोत्सवमा डेढ करोडको कारोबार भएको छ । होटल एशोसियसन भेडेटारको आयोजनामा पुस १६ गतेबाट तीन दिनसम्म सञ्चालन भएको फेस्टिभलमा डेढ करोड बराबरको कारोबार भएको हो ।
दुई करोड आर्थिक कारोबार हुने लक्ष्य राखिए पनि डेढ करोडको कारोबार भएको होटल एशोसिएसन भेडेटारका अध्यक्ष तुलराज लिम्बूले जानकारी दिए ।
Advertisement
‘४० देखि ५० हजार आन्तरिक तथा बाह्य पर्यटक भित्र्याउने लक्ष्य राखिएको थियो’, उनले भने, ‘४० हजार बढी पर्यटक आउनुभयो । जसमा भारतीय र आन्तरिक हुनुहुन्छ । जुन उद्देश्यले फेस्टिभल आयोजना गरिएको हो, लगभग लक्ष्य पुरा भयो ।’
फेस्टिभलले स्थानीय परिकार, अर्गानिक उत्पादन तथा विभिन्न सामग्रीको प्रचारमा थप टेवा पुगेको अध्यक्ष लिम्बूले उल्लेख गरे । तीन दिनको प्याकेज बनाएर विभिन्न स्थानमा पर्यटकलाई घुमाउने योजना फेस्टिभलमा पहिलो भएको र यो अन्य समयमा पनि जारी रहने बताए । ‘यो प्याकेजको बारेमा पनि धेरैले सोध्नुभयो,’ उनले थपे, ‘पहिलो पटक पनि हो । आगामी दिनका लागि यसले सहज बनायो ।’
धनकुटाका स्थानीय निकायसँग पर्यटकीय गन्तव्यको प्रचारका लागि समन्वय भएपनि सोचेजति उपलब्धि हुन नसकेको उनको भनाइ छ । समय अभाव र स्थानीय तहले पर्यटकीय गन्तव्य, कला संस्कृति र उत्पादनको बारेमा जानकारी उपलब्ध गराउन नसक्दा सोचेजति उपलब्धि नभएको उनले बताए ।
